來來小吃店 - 綜合紅豆湯

想食呢間來來小吃店好耐，
上次因為手工芋圓售罄所以放棄，
呢次早咗嚟到總算食到。

由某啲報導得知佢哋係由台灣人開同埋係家庭式經營，
加上當日只有一個人負責店面加食品製作嘅工作，
所以就算人龍唔長都要等好耐。



佢哋主打黑糖刨冰，
不過當日天氣太凍，
於是就買咗冬季限定嘅綜合紅豆湯，
暖暖哋嘅甜湯湯質濃，唔係稀如水嗰種。



我最期待嘅手工芋圓就大約有七至八大粒，
同埋有三種味道，
分別係芋頭、地瓜同綠茶，
芋頭同地瓜微甜，
綠茶微微甘澀，
三款嘅口感都Q軟討好。

另外仲有紅豆、小湯圓同粉圓，
紅豆幾大粒同埋煮得剛好爆開，
軟腍但仍然有咬口，
小湯圓軟熟、粉圓煙韌有彈性，
整體配料嘅份量都幾豐富。
甜度又唔重，
有啲家常嘅感覺。

朋友嘅薑汁黑糖豆花同樣都係熱食，
配搭都幾滋潤，
不過就好似少咗啲睇頭咁。