永年士多 - 人氣車仔麵

相信大多數人都唔會對永年士多感到陌生，
以車仔麵馳名，
晌元朗已經有多年歷史，
直至近年重新裝修，
昔日街坊式食店變得更光鮮企理。

雖然同棺材舖為鄰，
亦已經過咗午餐時間，
但店外仍有人龍，
可見人氣非常厲害。

入口收銀處上方有塊電子顯示屏，
可以一邊排隊一邊諗食乜。

晌收銀處叫咗嘢食同晌取餐處拎咗嘢食之後，
就可以自己搵位坐。

入面嘅環境整潔，
其中一面牆上仲掛咗舊日嘅招牌。
落地玻璃窗嗰邊係一列高身吧檯，
可以邊食邊望街。

我試咗淨餸，
分別係豬腸、豬紅、雞翼、冬菇、蘿蔔同菜心，
辣度就揀咗小辣。

豬腸軟腍冇腥味，
豬紅嫩滑爽口，
雞翼煮得雞骨同雞肉輕易分離，
冬菇香而有咬口，
蘿蔔甜香冇渣，
菜心翠綠脆身，
食物本身都已經有調味，
唔係白烚煮熟再拼埋一齊。

小辣辣度適中，
當中夾雜住香料味，
湯底飲起嚟惹味，
不過就有少少令人口乾。

早有預備咁叫咗杯紅豆奶茶冰試試，
紅豆同奶茶嘅比例接近一半半。



冰塊打得細碎，
紅豆煮到軟身起沙，
質感濃稠，
奶茶嘅茶味同奶味平均，
甜味啱啱好，
拎嚟解渴都唔錯。