村爺爺 - 龍蝦湯泡飯(麵)

晌油麻地砵蘭街嘅村爺爺，同一條街有三間唔同名嘅分店，主打食物各有不同，呢次試咗龍蝦湯泡飯做主打嗰間。



港式餐廳嘅格局，環境企理。



牆上面貼晒報章雜誌嘅介紹，仲有老闆同多位明星嘅合照。



啱啱好係下午茶時段，幾乎所有套餐都包熱飲，比其他時段抵食。



睇過其他人嘅相，覺得極上海鮮龍蝦湯泡飯最吸引。實物的確好有睇頭，晌一間平民餐廳嚟講可算難得。



龍蝦頭主要係用嚟裝飾，另外仲有扇貝、青口、八爪魚、魷魚同蜆肉。扇貝大隻肥厚唔韌，其他海鮮口感爽彈。各款海鮮嘅件數仲唔少，如果晌海鮮專門店食嘅話應該唔止六十幾掛？

龍蝦湯方面色澤質感比較淡同薄，不過飲起嚟微鹹有蝦香，亦無乜令人覺得口渴。湯面仲有蔥花同薑絲，既辟腥又可以提鮮。海鮮下面仲墊咗生菜，食啲蔬菜感覺平衡啲。

原本怕泡飯份量太多會食唔晒，於係將佢轉做米線，諗唔到麵量都好多下！



餐飲揀咗熱奶茶，飲起嚟順滑，感覺唔錯。

麥當勞 - PIE DAY

最近麥當勞嘅香芋批又再次登場，
晌咁多款曾經推出過嘅新口味炸批之中，
佢都可以算得上係最討我歡心嘅款式之一嚟。

拎上手嘅時候仲係熱辣辣，
批嘅外層炸得好脆卜卜，
內層嘅餡料就比較杰身但又有少少流心嘅質感，
而且每咬一啖都可以食到口感軟綿綿嘅切粒香芋肉，
味道甜甜蜜蜜咁都幾唔錯。

我係晌3月14號PIE DAY嗰日買嘅，
除咗比平時平好多之外，
仲隨批跟埋一張印咗QR Code嘅貼紙，
可以自己晌網上面揀返個Pie Message嚟送俾人，
都幾好玩呀。

榮耀餐廳 - 價錢唔太貴

夜晚去試榮耀餐廳，
佢哋嘅面積唔算大，
有少少港式嘅感覺，
但環境乾淨企理。



叫咗啲嘢食再轉套餐，
是日餐湯係甘筍薯仔忌廉湯，
上面有幾粒麵包粒，
湯嘅質地濃稠飲落香甜。



之後就係白酒清煮藍青口，
藍青口用咗白酒、洋蔥、蒜蓉等等一齊煮，
肉質唔韌同埋都幾香口。

番茄肉醬意粉當中嘅肉醬加咗番茄粒、洋蔥、蒜蓉同香草等等，
份量唔少，
肉碎比醬汁仲要多，
意粉煮得唔軟唔硬，
同肉醬撈埋一齊食感覺唔錯。



最後飲埋熱檸檬茶，
咁就啱啱好喇。

茶室 - 豐富喇沙

去開九龍灣，
夜晚去咗呢間茶室買嘢返去食，
朋友嘅檳城福建蝦麵，
就咁睇配料有豬腩肉、蝦、烚蛋、通菜、炸乾蔥，
下層就係油麵同米粉，
湯底就分開碗嚟裝嘅。



我就買咗星加坡喇沙，
同樣分咗兩個外賣紙碗，
呢碗係雞絲、豆卜、蝦肉、烚蛋、九層塔、芽菜同米線。

呢碗就係喇沙湯，
面層泛起紅色嘅辣油，
湯入面仲有幾片魚片。

將所有配料放埋一齊，
再倒咗三分一喇沙湯入去，
份量已經多到就嚟滿咁。
喇沙湯飲落有椰汁香，
辣度輕微都幾惹味。

雖然價錢唔平，
不過啲配料都幾豐富嘅。

Lady M - 千層蛋糕之外

去開呢頭見附近又有Lady M，
就去食個甜品，
記得早年啱啱開業嗰陣一位難求，
就算外賣都要等好耐，
而家熱潮稍為冷卻，
加上港島區兩間分店相繼營業之後，
晌尖沙咀店堂食變相易搵位得多。

伯爵茶千層蛋糕係用咗多層班戟皮堆疊而成，
雖然講唔上千層，
但都有接近十幾二十層左右。
蛋糕表面同每層之間都搽咗伯爵茶味忌廉，
同埋灑咗伯爵茶葉碎做裝飾，
某啲切餅上仲可能會有矢車菊嘅花瓣，
可惜我哋呢件啱啱好係無嘅。
食起嚟有啲茶葉芳香，
唔算太甜。

除咗馳名嘅千層蛋糕之外，
佢哋其實都仲有其他類別嘅蛋糕。

柚子芝士蛋糕相對起千層蛋糕嚟講就細件少少，
上層係挺身嘅焗芝士蛋糕，
下層就係比例較少嘅呍呢嗱海綿蛋糕，
整體質感滑溜，
忌廉芝士味道香濃明顯，
當中仲夾住柚子嘅清香，
加埋一齊都唔會太膩。

Gaylord - 假日午餐

呢間Gaylord Indian Restaurant有多年歷史，
入面環境寬闊雅緻。

我哋係假日去嘅，
以尖沙咀嚟講午市時段仲咁寧靜，
實在非常難得。

不過無幾耐就有唔少食客入座，
同埋好多都係印度人或外藉人士為主，
侍應亦主要以英語溝通。

睇咗睇餐牌，
覺得散叫都唔係好抵食，
權衡之下決定食百幾蚊一位嘅Lunch Buffet。

食物都算有幾多選擇，
啲菜式嘅中文名係我上網搵，
可能會同實際有啲出入，
分別有Vada（小扁豆冬甩）、Idli（白米糕）、Saffron Pulao（印度米飯）、Vegetable Samosa（雜菜餡角）、Fish Amritsari（炸魚餅）。

同埋Sambhar（燉小扁豆）、Chicken Malai Tikka（香料烤雞）、Vegetable Jalfrezi（雜菜咖喱）、Chicken Makhani（牛油雞）、Lamb Bhuna（羊肉咖哩）、Saag Paneer（菠菜茅屋芝士）、Dal Makhani（豆子咖喱）。



另外仲有四款特色沙律以及多款醬料，
甜品方面有Soan Papdi、Mango Phirni（芒果米布甸）、Gulab Jamun（蜜汁圓球）、Seviyan Kheer（米粉布甸）。
呢度有啲菜式之前都未食過，
感覺都幾特別。

同唔少印度菜館一樣，
佢哋嘅Naan（烤餅）係廚師晌店入面烤製，
可以拎嚟點唔同嘅咖喱。

呢個Dosa就係第一次食，
薄薄嘅班戟皮入面包住薯蓉之類嘅嘢，
有少少似食緊法式可麗餅咁。

其中我最鍾意嘅係Saag Paneer，
入面嘅茅屋芝士質感偏硬，
食落好似硬豆腐，
打成蓉嘅菠菜就無乜辣味，
感覺都幾健康。

Fish Amritsari同Chicken Malai Tikka都係第一次食，
前者微辣而惹味，
後者就有好香嘅燒烤味。
Vegetable Samosa就幾健康飽肚，
Saffron Pulao入面啲印度米長長哋，
粒粒分明黏性低同比較乾身，
咬起嚟比我哋平日食到嘅白米脆口。

甜品方面我只係食咗Gulab Jamun，

原來係將牛奶揉成小圓球再落油炸，

之後就浸晌糖漿之中，

食落甜味極高，

就好似食緊一粒吸滿煉奶嘅小蛋糕咁，

不過都幾解辣。

Lady M - Rose Mille Crepes

呢日同朋友去咗Lady M食甜品，
佢哋嘅分店遍佈國際多個地方，
而呢款Rose Mille Crepes就係香港限定嘅款式，
蛋糕頂層係半透明、淺粉紅色嘅玫塊味啫喱，
同埋用咗可食用嘅乾玫瑰花瓣點綴，
下層就由好多塊班戟皮組合而成，
班戟皮煎得非常非常非常非常薄，
甚至比一張紙更薄，
每片班戟皮之間都均勻咁搽咗薄薄一層嘅玫瑰味忌廉。
食起嚟口感幾軟綿滑溜，
甜味方面都唔會好重，
當中仲有淡淡哋嘅玫瑰花香味，
味道都算唔錯。

貢茶 - 再嚟珍珠奶茶

又同人去咗買貢茶嚟飲，
又係買咗珍珠奶茶，
上次天氣太凍要熱嘅，
呢次天氣開始回暖就買咗凍嘅，
唔知係唔係心理作用，
凍飲好似比熱飲偏甜咗少少，
不過仍能飲到奶味同少少茶香。
珍珠至少佔個杯嘅三分一，
份量都幾多下，
幾乎每飲一啖都食到珍珠，
口感煙煙韌韌好Q軟。

朋友嗰杯古早味酸梅湯，
佢話唔係好受到嗰種酸酸甜甜嘅感覺，
仲話有少少似飲緊益力多，
我一向對酸味食物飲品都唔抗拒，
可惜怕啱啱飲完奶類又飲佢兩者會相沖，
所以都講唔到係乜味喇！

權發海鮮酒家 - 海鮮晚餐

夜晚同人去咗權發食晚餐，
食咗幾樣嘢，
不過只係影咗少少。



椒鹽瀨尿蝦皇比平時嘅瀨尿蝦大隻近一半，
表面均勻咁沾咗炸蒜蓉同辣汁，
蝦殼易拆蝦身實淨，
食起嚟彈牙惹味。



之後就係白胡椒煮花蛤
第一次食用湯浸嘅方式烹調嘅花蛤，
花蛤肥厚無沙，
同埋加咗大量嘅白胡椒，
辛香得來又能夠突顯鮮甜味，
最底下仲有啲粉絲晌度，
吸滿湯汁同花蛤精華，
唔花巧但又幾出色。



芝士龍蝦伊麵入面嘅龍蝦斬成小件再蘸粉走油至表層微微酥脆，
再用加咗芝士等等嘅醬汁炒勻，
然後就淋晌煮好嘅伊麵之上，
鹹香中又有幾分芝士嘅奶味，
都唔錯。

麥當勞 - 好耐無食佢嘅早餐

好耐無食麥當勞嘅早餐，

一向都鍾意食佢哋嘅薯餅，

炸得外脆內軟，

可惜只限早餐時段供應。

飲品方面就要咗濃滑奶茶，
茶味唔及茶餐廳咁濃郁，
不過以快餐店嚟講已經算唔錯。

呢個近期先出嘅黃金蛋餅火腿堡，
用咗烘到微脆嘅英式鬆餅麵包夾住蛋餅、火腿扒同芝士。
火腿扒煎得香脆、芝士就鹹香惹味，
蛋餅入面就有粟米等等蔬菜，
夾雜住黃紅綠色嘅小粒粒，
質感嫩中有幾分爽口，
只係雞蛋味唔太突出。

呢個漢堡雖然講唔上好出眾，
但作為早餐都算唔錯嘅。