Emilia - 大薄餅

節日晌人哋度慶祝，
朋友晌Emilia買咗原個裝嘅松露野菌薄餅。



因為即叫即焗，
佢話等咗差唔多二十分鐘左右就拎得，
個盒比普通嘅長好多，哈。



因為係外賣自取，
加上天氣關係，
拎到嚟已經凍咗少少。
不過打開一刻仍然震撼，
長形嘅特大薄餅就好似一個鍵盤咁，
甚至比鍵盤仲要大，
好得意。



之後我哋就將個薄餅一分為八，
薄餅上面鋪滿雜菌、黑松露、水牛芝士同番茄醬，
無論係聞落抑或食落都充滿濃郁嘅黑松露味，
番茄醬亦微酸清新，
芝士量啱啱好，
味道平衡。



縱使薄餅係啱啱焗起熱辣辣咁入盒，
拎到嚟後個盒都無俾水氣沾濕，
薄餅亦無變得腍身。
餅底筋度高，
質感煙韌有彈性，
薄餅中間嘅邊位仲有微脆口感。
就算凍咗少少都算好食，
如果即場趁熱食或者自己焗返熱佢應該仲惹味。

正宗山西刀削麵店 - 都唔錯

去呢類地方都預咗環境唔會太好，去到都幾爆，好彩咁啱有人走唔洗等。

揀咗牛腩豬大腸刀削麵，牛腩入味，有啲肥膏又唔係成口油嗰隻，豬大腸係因為見有人話好食就叫嚟食吓，冇腥臭味，鹵得幾腍之餘仲有爽脆口感。

呢間話刀削麵係即叫即削，呢種麵比平日啲麵多凹凸位，咁就可以帶多啲湯，但夾起嗰時好易晌筷子之間滑出嚟，所以一定要用支匙羹輔助先食到。

湯底方面都幾濃，有啲鹹不過我都接受到，只係浮晌面啲油有啲嚇人，都係適宜久唔久食一兩次咋。

糖百府 - 新裝過?

呢間糖百府好似新裝修過，個門面同入面都幾靚，好似啲cafe咁。

我食咗佢個蘋果金寶配雪糕，比平時食開嘅蘋果金寶有啲分別，大大粒嘅金寶脆脆無論質感同外表都幾似人哋凱撒沙律啲麵包粒，都幾特別，但反而冇咗平日金寶嗰種脆口嘅感覺，蘋果肉甜甜哋，但我就覺得佢肉桂味唔濃。

翠河餐廳 - 食咖喱

紅日去食，原本趕到下午茶時間，不過坐低咗侍應就走埋嚟話下午茶餐提早停，咁都無所謂喇。

叫咗份馬來咖喱牛筋腩飯同凍奶茶，個咖喱飯目測下份量適中，外表算可以，只係啲薯仔比較碎濕濕。牛筋腩都冇煮到太乾太韌，主角咖喱汁嘅味道就鹹咗啲，我覺得佢嘅辣味唔係好夠，比我之前喺另一間分店食到嘅失色。

凍奶茶就有茶香，同埋唔係好甜，合格。