The Joomak - 綠色韓菜

海港城LCX入面嘅The Joomak，
係間比較新派嘅韓國菜。

幾個人嚟就可以試多幾款，
先係韓式素肉飯卷，
從外觀上睇同一般嘅韓式紫菜飯卷無異。

中間包住切絲素雞肉、胡蘿蔔同青瓜等等，
再灑上杏仁片，
同埋有紫牛油生菜伴碟，
一口一件都幾爽脆。

韭菜煎餅用咗不含牛奶雞蛋嘅粉漿煎成，
嫩綠嘅顏色就主要嚟自韭菜本身，
質感薄薄、脆口得來又有幾分煙韌。
韭菜香濃單食都夠味，
又或者可以蘸佢哋嘅特製醬汁，
微微酸味可以中和熱氣感。

黑蒜雞嘅炸雞係無骨、好似雞球嗰種，
外皮微脆肉質軟嫩。
表面淋上大量杰身嘅黑蒜醬，
味道鹹香討好，
同埋洋蔥絲同炸蒜片一齊食嘅話就仲香口。

燒LA牛肋骨嘅燒汁甜香而濃郁，
牛肋骨油花較多，
食起嚟柔軟中有幾分嚼勁，
伴碟有羽衣甘藍、韭菜、洋蔥同蜜桃等等雜菜，
可以減輕肉類嘅膩感。

人參蜜糖雪沙嘅雪沙打得綿滑，
牛奶同乳酪味明顯，
人參味唔重但有回甘。

紅棗草莓雪沙入面有唔少打碎咗嘅紅棗肉，
草莓味淡，
相對起嚟就比較甜，
不過都算唔錯。

鍋心 - 旺區火鍋放題

我哋晌晚上5至9:30嘅時段嚟，
未計加一$158一位任食兩個鐘，
以旺角嚟講都算合理。

雖然佢哋晌旺角同太子交界，
當日亦正好係晚餐時間，
但嚟到嘅時候都唔到半滿，
的確有少少意料之外。

環境方面就同坊間大部份火鍋店大同小異，
只係啲位擺放得比較迫，
有啲仲要係靠柱而坐，
對於身形比較健碩嘅人嚟講可能會有少少唔方便。

醬料係自助嘅，
除咗比較大路嘅豉油、辣椒、蒜蓉、炸蒜蓉、蔥花同芫茜之外，
仲有沙薑碎、花椒油同麻醬等等。

飲品都係自助嘅，
有罐裝汽水同唔同款式嘅韓式飲品，
選擇算多。

甜品方面當晚無宣傳牌寫嘅泰式甜品，
只係得雀巢雪糕，
不過口味都幾多，
包括有芝麻、紅豆、芒果同呍呢嗱四款。

火鍋料大約有幾十種，
用畫紙仔嘅形式order，
選擇大眾化想食嘅都有。

呢度有要額外加錢嘅台式湯底，
但對我哋嚟講吸引度唔大，
所以只係叫咗正宗麻辣鍋，
湯底被一層又厚又紅嘅辣椒油徹底覆蓋住，
仲隱約可見底下有大量辣椒片。

無幾耐店員就將我哋order嘅食物拎嚟，
當中比較深印象嘅係黑豚肉幾鬆化、羊肉片羶香、手切肥牛軟嫩，
海蝦、手打墨魚滑同黃金魚腐都幾鮮香彈牙，
豆腐滑溜、豬肚爽口，
韭菜鮮肉餃同鮮蝦水餃都聲稱自家即日製作，
外皮薄肉餡豐富，
包得實淨唔鬆散。

我同朋友分別飲咗忌廉溝鮮奶、石榴汁同烏龍茶等等，
韓式飲品比較細罐，
咁就可以飲多幾罐唔同口味嘅。

最後以芝麻同紅豆雪糕做總結，
好飽呀！

我哋埋單走嗰陣啱啱好過咗9:30，

正正係$138一位嘅特價時段，

食客相繼入座，

場面變得熱鬧起嚟，

似乎而家先係佢哋嘅黃金時間。

宣傳牌上指佢哋係間新派火鍋，
實際上火鍋料嘅選擇比較大路，
不過以價錢嚟講質素都算唔頹。

至於所謂嘅新派，

我覺得應該係指有提供韓式飲品吧，

始終以港式火鍋放題嚟講又真係比較少見啲嘅。

榮樂茶餐廳 - 另類環保餐廳

嚟到瀝源邨嘅榮樂茶餐廳，
餐廳有幾十年歷史，
門面同陳設等等都充滿港式嘅懷舊氣氛。

呢度最特別嘅地方係用口述嘅方式落單，
店員同廚房都係憑記憶記低食客嘅order，
唔花一紙一筆，
所以我哋私自叫佢做另類環保餐廳。

當日所見雖然係午餐時間，

店外露天同店內室內位置嘅食客唔少，

但總算無發生漏單或要催單嘅情況。

我哋同時要咗沙爹牛肉粉麵，
一個配通粉一個配公仔麵，
沙爹牛肉份量都幾多，
調味香濃，
湯底味道足夠，
通粉就煮得比較軟身。

火腿奄列油份偏多，
稍欠健康，
但口感相對而言就比較滑。
多士烘得脆口，
不過就壓得好扁身。

凍熱奶茶茶色深，
質感唔嚡。

自從公共屋邨商場逐漸改革後，
好似呢種街坊式嘅茶餐廳已經愈來愈少見。

必發茶餐廳 - 下午茶餐

附近有好多間茶餐廳，
最後入咗呢間。

入面有卡位亦有室外座，
同好多港式茶餐廳相同。



啱啱好係下午茶時段，
套餐價錢由廿幾到四十幾不等，
兼有廿多款選擇。



我叫咗下午茶餐入面嘅炸雞髀配沙律，
沙律有罐頭雜果、青瓜、西芹、胡蘿蔔等等酸酸甜甜咁。
炸雞髀大小適中，
外皮炸得非常非常非常脆卜卜，
雞肉都算嫩滑，
調味稍重，
配沙律食就可以中和一下。

朋友叫咗午餐嘅鴨腿湯飯，
白飯另上。
浸晌湯入面嘅係鴨背同鴨頭，
而唔係餐牌所聲稱嘅鴨腿，
鴨肉嘅比例亦比較少，
另有菜心跟埋，
味道就普普通通。

熱奶茶茶味同奶茶都唔算話好香，
不過都OK。

越南牛肉粉專門店 - 外賣越南菜

去咗越南牛肉粉專門店買外賣返去食，
買咗個招牌套餐，
包一客越式粉麵、小食同特飲。

香茅豬頸肉撈檬入面嘅豬頸肉爽脆香口，
鬆化得嚟仲有少少肉汁。

下層檬粉鋪咗啲切絲青瓜、胡蘿蔔、蔥花、炸乾蔥同花生碎，
加埋魚露一齊食都幾清新惹味。

小食方面原本想食米紙卷，
可惜啱啱好賣晒，
於是改要炸春卷，
細細件咁外皮微脆但又有啲煙韌口感，
調味比較濃但可以接受。

朋友就叫咗火車頭套餐，
包一杯飲品。
火車頭湯河入面有生牛肉、牛筋、牛丸同熟牛肉。

湯河跟埋包調味料，
分別有芽菜、九層塔、青檸同辣椒片，
加埋入去個火車頭度一齊食都唔錯。

我食咗少少牛丸同牛筋，
前者彈牙後者爽口味道唔錯。
仲飲咗少少個湯，
非常香濃兼有牛味，
不過無口乾嘅感覺，
我覺得比撈檬更出色。

飲品就揀咗熱越南蓮花茶，
蓮花即係荷花，
飲落幾有荷葉香都幾消滯。
另外紅毛丹冰入面有四粒釀咗罐頭菠蘿肉嘅原粒紅毛丹，
味道就甜咗啲。

譚仔三哥 - 返唔到轉頭

呢晚又外賣譚仔三哥返去食，
以前多數會叫三哥酸辣，
但自從食過煳辣之後就返唔到轉頭，
鍾意佢唔係一味嘅辣，
每一口都有多重香料嘅味道，
湯底嘅質感亦比其他口味嚟得濃郁。

每碗米線入面本身已經有韭菜、芽菜同腐皮，
另外仲加咗腩肉、木耳絲同冬菇，
呢次嘅腩肉肥膏部位明顯，
口感仍然脆身軟嫩，
木耳絲同冬菇就爽腍，
加咗佢哋之後令湯底仲鮮味。

另外仲買咗份大嘅土匪雞翼，
表面沾滿調味料，
賣相黝黑唔太討好，
食落就外脆內有肉汁，
味香微辣。

Green Waffle Diner - 鬧市嘅下午

嚟到十三樓嘅Green Waffle Diner，
幾鍾意呢度嘅窗邊位，
都可以話幾寧靜。

啱啱係下午茶時段嚟，
套餐價錢以銅鑼灣嚟講叫正常。

原本係為窩夫而嚟，
不過入嚟前見入口附近嘅沙律吧好似唔錯，
就決定試埋佢。

呢度嘅沙律餐有大細之分，
我哋叫咗細嗰份，
可以揀三款口味。

藜麥粟米雞胸沙律入面嘅雞胸切得幾大粒，
但肉質唔嚡，
另外有粟米、車厘茄同藜麥，
既健康又有咬口。

脆煙肉薯仔沙律嘅薯仔表面沾咗啲醬汁同煙肉碎，
食落軟腍惹味。

煙肉羽衣甘藍沙律嘅煙肉切成片狀，
咬起嚟香脆同有油香少少，
羽衣甘藍就爽口同有微微甘澀，
營養價值又高，
感覺都幾清新醒胃。

原味窩夫伴鮮果及雪糕，
窩夫外脆內鬆軟幾香口，
食嗰陣暖暖哋，
伴碟嘅藍莓、切粒青蘋果同士多啤梨酸酸甜甜咁，
再配埋呍呢嗱雪糕一冷一熱咁口感都唔錯。

Achacha Cafe & Bistro - 法式煎薄餅

呢間Achacha Cafe & Bistro晌車路盡頭同泊車位嘅旁邊，
車輛出入都幾繁忙。

不過入到去之後，
又係另一番景象。

落玻璃窗透入唔少光線，
牆上仲畫咗唔同嘅圖畫。



有聞佢哋以法式薄煎餅馳名，
而且仲有鹹甜之分。

我就晌數款tea set之中試咗雜莓甜奶法式煎薄餅，
薄餅面積好大，
外型就似一把中式紙扇咁。
邊位煎得非常薄脆，
被餡料沾濕嘅部份就比較煙韌。

除咗鋪面之外，
中間亦夾咗唔少士多啤梨果肉，
另外仲有鮮忌廉同質感好似煉奶嘅甜奶一齊食，
味道酸香醒胃冇負擔。

榛子鮮奶咖啡有淡淡嘅榛子甜香，
咖啡味就甘香平衡。

永年士多 - 人氣車仔麵

相信大多數人都唔會對永年士多感到陌生，
以車仔麵馳名，
晌元朗已經有多年歷史，
直至近年重新裝修，
昔日街坊式食店變得更光鮮企理。

雖然同棺材舖為鄰，
亦已經過咗午餐時間，
但店外仍有人龍，
可見人氣非常厲害。

入口收銀處上方有塊電子顯示屏，
可以一邊排隊一邊諗食乜。

晌收銀處叫咗嘢食同晌取餐處拎咗嘢食之後，
就可以自己搵位坐。

入面嘅環境整潔，
其中一面牆上仲掛咗舊日嘅招牌。
落地玻璃窗嗰邊係一列高身吧檯，
可以邊食邊望街。

我試咗淨餸，
分別係豬腸、豬紅、雞翼、冬菇、蘿蔔同菜心，
辣度就揀咗小辣。

豬腸軟腍冇腥味，
豬紅嫩滑爽口，
雞翼煮得雞骨同雞肉輕易分離，
冬菇香而有咬口，
蘿蔔甜香冇渣，
菜心翠綠脆身，
食物本身都已經有調味，
唔係白烚煮熟再拼埋一齊。

小辣辣度適中，
當中夾雜住香料味，
湯底飲起嚟惹味，
不過就有少少令人口乾。

早有預備咁叫咗杯紅豆奶茶冰試試，
紅豆同奶茶嘅比例接近一半半。



冰塊打得細碎，
紅豆煮到軟身起沙，
質感濃稠，
奶茶嘅茶味同奶味平均，
甜味啱啱好，
拎嚟解渴都唔錯。