榮樂茶餐廳 - 另類環保餐廳

嚟到瀝源邨嘅榮樂茶餐廳，
餐廳有幾十年歷史，
門面同陳設等等都充滿港式嘅懷舊氣氛。

呢度最特別嘅地方係用口述嘅方式落單，
店員同廚房都係憑記憶記低食客嘅order，
唔花一紙一筆，
所以我哋私自叫佢做另類環保餐廳。

當日所見雖然係午餐時間，

店外露天同店內室內位置嘅食客唔少，

但總算無發生漏單或要催單嘅情況。

我哋同時要咗沙爹牛肉粉麵，
一個配通粉一個配公仔麵，
沙爹牛肉份量都幾多，
調味香濃，
湯底味道足夠，
通粉就煮得比較軟身。

火腿奄列油份偏多，
稍欠健康，
但口感相對而言就比較滑。
多士烘得脆口，
不過就壓得好扁身。

凍熱奶茶茶色深，
質感唔嚡。

自從公共屋邨商場逐漸改革後，
好似呢種街坊式嘅茶餐廳已經愈來愈少見。