唯一雲貴川風味 - 久別酸辣米線

鍾意食辣嘅人應該唔會對荃灣四陂坊嘅唯一雲貴川風味感到陌生，
我好耐之前都食過幾次，
不過事隔太耐，
加上之前無好好咁用文字記低，
對佢嘅味道已經有少少模糊，
於是呢次外賣就買咗小辣作為熱身。



朋友嗰碗配料揀咗豬腸、腩肉、豬頭肉，
我就係腩肉、豬頭肉、豆卜。

豬腸都幾多肥膏，
不過食落香口。

豬頭肉骨位爽脆，
肉軟腍有膠質。

腩肉肥瘦均勻，
切得大片唔薄身，
本身已經有明顯嘅調味，
有咬口得來又鬆化。

豆卜食落外煙韌內軟綿，
吸滿湯汁都唔錯。

米線偏粗同軟身，
外賣返去嗰陣係同湯一齊放晌同一隻碗度，
不過浸晌湯度咁耐都無話變得太腍。

湯入面仲有唔少酸菜、芽菜同芫茜，
小辣嘅湯面泛起薄薄一層辣油，
仲將成碗染成紅色，
睇落都幾嚇人，
但飲落嘅話辣味輕微，
味濃又唔會過份重口味，
食完都無乜覺得好口渴。

手作餃子專門店 - 如果可以嘅話

同朋友去咗呢間手作餃子專門店食餃子，
叫咗鮮肉韭菜煎餃，
煎香後嘅餃子皮脆得來又有少少煙韌，
韭菜配鮮肉呢個配搭就又香又惹味，
但係如果煎餃可以煎得再焦脆一啲可能會更加好。



至於自製菜脯就係店員俾，
而唔係好似另一間咁擺晌枱度任用，
佢用咗個碟仔裝住，
拎上手似係啱啱由雪櫃拎出嚟凍凍哋咁，
食落調味都唔錯，
但就好似唔係好夠辣。



我哋仲叫多咗份香辣豬耳，
豬耳嘅質感幾爽脆，
辣味就比較突出，
不過唔會辣到噴火，
都算食得幾過癮。