囍鍋 - 鮮味蒸氣鍋

去咗尖沙咀天文臺道8號，
呢棟商業大廈入面聚集咗唔少食肆，
今次就試試囍鍋。

入口旁邊有幾個大魚缸，
養咗唔同嘅新鮮海產。

佢哋嘅樓底夠高，
空間感十足。

可能因為踏入夏季天氣開始熱，
當晚嚟食蒸氣鍋嘅食客唔算多。

呢度嘅蒸氣鍋都係用竹帽咁嘅蓋蓋住，
同埋鍋底可以煮粥嘅。

先食刺身，
三文魚個口感幾肥美。

呢個係未切嘅象拔蚌仔，
大約等如成人手掌嘅大細。

之後就拎入廚房去內臟同切條，
蒸熟咗咬起嚟脆身鮮味，
個人覺得唔錯。



中蝦嚟到嗰陣仲郁緊，
蒸完之後蝦肉好厚同彈牙。

順德污糟雞嘅雞件入面有紅棗、冬菇、蟲草花、大頭菜絲，
雞肉唔嚡口，
調味又唔會太過濃。

蔬菜有茄子、秋葵、菜心等，
不過我哋就試咗田園孖寶，
其實係切片南瓜同番薯，
南瓜軟綿微甜、番薯就幾粉嫩。

嚟到甜品環節，
桂花糕入面嘅杞子令佢好清甜，
餐後食係幾滋潤嘅。

經過一輪蒸海鮮同其他食物嘅過程後，
石鍋入面嘅粥都煮好喇。



仲可以配埋炸脆片、蔥花、芫茜或大頭菜粒嚟食。

Shine - 令人失預算嘅Brunch

呢間Shine身處嘅大廈入口晌漢口道某連鎖咖啡店側邊，
雖然同iSQUARE只係一街之隔，
但就少咗份繁華，
都幾旺中帶靜。

裝修就係近年流行嘅工業風，
當中仲用木條砌咗唔同嘅裝飾。

玻璃窗位可以睇到尖沙咀嘅鬧市景，
牆上仲有盞剪影燈折射出店名Shine字樣，
細心一睇剪影其實係港島區嘅維港景嚟。

除咗散叫餐牌之外，
我哋去嗰日仲有星期六、日同公眾假期限定嘅Brunch Menu。

呢日試咗幾樣嘢，
先係燒日本M4和牛薄切。

日本M4和牛燒得生熟啱啱好，
薄切嘅厚度係有啲咬口嗰種，
食起上嚟軟嫩有油香，
同埋加咗少少芝士片同黑醋調味，
食下底下嘅火箭菜就可以解膩。

想食多啲蔬菜，
晌Brunch Menu入面嘅凱撒沙律同意式雜菜多士之間揀咗後者，
因為好似少見啲啲咁。

鑊仔入面有多款切粒雜菜，
分別係意大利青黃瓜、番茄、甘筍、茄子、洋蔥等等，
意式醬汁好杰身，
個味道都幾平衡。
長形多士表面塗咗牛油，
單食就香脆，
用佢嚟蘸醬食就幾清新，
連平時怕酸味嘅朋友都話唔錯。

侍應拎呢份炸魚薯條嚟嘅時候，
我哋真係有少少打咗個突。

Brunch Menu唔係一人份量嚟咩？
實際份量真係令人失咗預算。
同埋平時嘅炸魚大多數整成長條形，
呢度就係成件好似塊炸魚扒咁，
上面就加咗啲鹽同黑椒碎調味。

炸魚食起上嚟魚肉紮實唔鬆散，
又唔會嚡口，
薯條就係厚切都幾脆。

我哋仲轉咗第二啲餐飲，
Rose Latte嘅拉花好靚，
同埋用咗玫瑰花點綴。

朋友就叫咗支Yeastie Boys Gunnamatta Tea Leaf IPA嚟試，
即係伯爵茶葉手工啤，
表面泡泡擺咗陣都冇乜點散開，
飲起上嚟幾甘香易入口。

原本想試埋甜品架，
但係Brunch Menu嘅炸魚薯條份量比預期多，
如果細食嘅話分分鐘兩個人share一份都夠，
惟有等下次先啦！

Espuma - 色彩繽紛甜品

睇網上消息話Espuma最近裝修咗，
之前係比較型格，
而家就走悠閒路線。

呢日試咗其中幾樣嘢，

玫瑰烏龍茶入面有玫瑰花乾同藍莓，
味道清甜。

海鮮番茄清湯有大蜆、蝦同藍青口，
清湯就另外用個壺裝住，
湯質清兼呈淡黃，
心諗點解唔係橙紅色嘅？
不過飲落又幾有番茄味。

彩虹麻糬窩夫配雪糕嘅色彩好豐富，
窩夫外皮薄脆內層煙韌，
彩色雪糕就主要係甜味，
但加埋啲微酸嘅芒果醬，
同埋鮮士多啤梨、黑莓同哈密瓜咁食總算討好。

咖啡拼盤係用咗咖啡慕絲蛋糕、咖啡慕絲、蛋白脆餅，
再加三色糖漿同朱古力曲奇餅碎組合而成，
賣相幾靚幾適合拎嚟呃like。
佢嘅甜度幾高，
同鮮黑莓同紅桑子一齊食就可以解膩。

西班牙油條配雪糕嘅油條織到成個藤球咁，
中間放咗一球呍呢嗱雪糕，
驟眼睇有啲似首飾盒咁，
口感有少少似餅乾條。

留意返佢哋嘅冷氣非常非常非常非常強勁，
女仔去食嘅話記得帶多件薄褸或披肩呀！

Green Door Coffee - 輕食午餐手沖咖啡

呢間Green Door Coffee原來有兩間分店，
一間晌尖沙咀嘉蘭圍，
呢間就晌銅鑼灣香港中央圖書館附近。

雖然係間咖啡店，
不過主菜嘅選擇都唔少。

叫咗份午餐試試，
個餐包埋雜菜湯，
湯入面有椰菜、西芹同洋蔥。

雞肉墨西哥餡餅配田園沙律嘅墨西哥薄餅烘得脆口，
中間夾咗雞肉、芝士同番茄醬，
醬入面有番茄等切粒蔬菜。
伴碟嘅田園沙律就有車厘茄同紫椰菜之類，
配埋油醋汁，
係一份唔膩嘅午餐。

佢哋仲有多款咖啡好似Latte同Cappuccino之類，
我唔想太花巧，
就決定試試手沖咖啡。

晌幾款咖啡豆之中揀咗Costa Rica Sumava Natural，
餐牌寫佢嘅aftertaste有啲似蘋果、士多啤梨、乾果、菠蘿，
飲落酸酸哋同幾有果香。
對於唔太習慣濃重咖啡嘅人嚟講，
呢類近似果味嘅咖啡豆就比較容易令人接受。