Lady M - 千層蛋糕之外

去開呢頭見附近又有Lady M，
就去食個甜品，
記得早年啱啱開業嗰陣一位難求，
就算外賣都要等好耐，
而家熱潮稍為冷卻，
加上港島區兩間分店相繼營業之後，
晌尖沙咀店堂食變相易搵位得多。

伯爵茶千層蛋糕係用咗多層班戟皮堆疊而成，
雖然講唔上千層，
但都有接近十幾二十層左右。
蛋糕表面同每層之間都搽咗伯爵茶味忌廉，
同埋灑咗伯爵茶葉碎做裝飾，
某啲切餅上仲可能會有矢車菊嘅花瓣，
可惜我哋呢件啱啱好係無嘅。
食起嚟有啲茶葉芳香，
唔算太甜。

除咗馳名嘅千層蛋糕之外，
佢哋其實都仲有其他類別嘅蛋糕。

柚子芝士蛋糕相對起千層蛋糕嚟講就細件少少，
上層係挺身嘅焗芝士蛋糕，
下層就係比例較少嘅呍呢嗱海綿蛋糕，
整體質感滑溜，
忌廉芝士味道香濃明顯，
當中仲夾住柚子嘅清香，
加埋一齊都唔會太膩。