Green Door Coffee - 輕食午餐手沖咖啡

呢間Green Door Coffee原來有兩間分店，
一間晌尖沙咀嘉蘭圍，
呢間就晌銅鑼灣香港中央圖書館附近。

雖然係間咖啡店，
不過主菜嘅選擇都唔少。

叫咗份午餐試試，
個餐包埋雜菜湯，
湯入面有椰菜、西芹同洋蔥。

雞肉墨西哥餡餅配田園沙律嘅墨西哥薄餅烘得脆口，
中間夾咗雞肉、芝士同番茄醬，
醬入面有番茄等切粒蔬菜。
伴碟嘅田園沙律就有車厘茄同紫椰菜之類，
配埋油醋汁，
係一份唔膩嘅午餐。

佢哋仲有多款咖啡好似Latte同Cappuccino之類，
我唔想太花巧，
就決定試試手沖咖啡。

晌幾款咖啡豆之中揀咗Costa Rica Sumava Natural，
餐牌寫佢嘅aftertaste有啲似蘋果、士多啤梨、乾果、菠蘿，
飲落酸酸哋同幾有果香。
對於唔太習慣濃重咖啡嘅人嚟講，
呢類近似果味嘅咖啡豆就比較容易令人接受。